పోలవరం రాష్ట్ర అభివృద్ధికి జీవనాడి: చిన్నపురెడ్డి రవీంద్రారెడ్డి

ఎన్టీఆర్ జిల్లా, జూలై 16 :బీజేపీ రాష్ట్ర అధికార ప్రతినిధి, ప్రముఖ న్యాయవాది చిన్నపురెడ్డి రవీంద్రారెడ్డి గురువారం పోలవరం ప్రాజెక్టును సందర్శించి నిర్మాణ పనుల పురోగతిని పరిశీలించారు. ప్రాజెక్టు నిర్మాణంలోని వివిధ విభాగాలను పరిశీలించిన ఆయన, అధికారుల నుంచి పనుల పురోగతి, పునరావాస కార్యక్రమాలు, నిర్మాణ నాణ్యతపై వివరాలు తెలుసుకున్నారు. ఈ సందర్భంగా రవీంద్రారెడ్డి మాట్లాడుతూ, పోలవరం ప్రాజెక్టు ఆంధ్రప్రదేశ్ అభివృద్ధికి అత్యంత కీలకమైన జాతీయ ప్రాజెక్టు అని అన్నారు. సాగునీరు, తాగునీరు, విద్యుత్ ఉత్పత్తి, వరద నియంత్రణ వంటి అనేక ప్రయోజనాలు ఈ ప్రాజెక్టు ద్వారా రాష్ట్రానికి చేకూరనున్నాయని పేర్కొన్నారు. ప్రాజెక్టు పనులు నాణ్యతతో పాటు వేగంగా పూర్తయ్యేలా అన్ని శాఖలు సమన్వయంతో పనిచేయాలని సూచించారు. నిర్వాసితుల పునరావాసం, పునర్నిర్మాణ కార్యక్రమాలను మానవతా దృక్పథంతో అమలు చేయాలని, అభివృద్ధితో పాటు ప్రజల సంక్షేమానికి సమాన ప్రాధాన్యం ఇవ్వాల్సిన అవసరం ఉందన్నారు. పోలవరం పూర్తయితే రైతాంగానికి శాశ్వత ప్రయోజనం చేకూరడంతో పాటు రాష్ట్ర ఆర్థికాభివృద్ధికి కొత్త ఊపు వస్తుందని అభిప్రాయపడ్డారు. ఈ పర్యటనలో బీజేపీ నాయకులు, పార్టీ ప్రతినిధులు పాల్గొని ప్రాజెక్టు నిర్మాణ పురోగతిని పరిశీలించారు.